KOMUNIKATË PËR MEDIAT
Për lansimin e projektit “Trashëgimia dhe kultura arumune, së bashku dhe në një tryezë”
Fier, 13 dhe 14 shtator 2025
Demonstrim 2- ditor gatimesh tradicionale të përgatitura nga gratë e pakicave kombëtare të Fierit
Më 13-14 shtator 2025 pranë Kompleksit “APOLLON” në Fier do të mbahet veprimtaria dyditore kushtuar promovimit të trashëgimisë kulturore të pakicave kombëtare në Shqipëri, mbështetur nga Komiteti për Pakicat Kombëtare të Republikës së Shqipërisë në kuadër të Thirrjes së Dytë për vitin 2025 me moton “Diversiteti na bashkon: Ruajmë traditat dhe zakonet, ndërtojmë të ardhmen”. Me kulinarinë shprehim jo vetëm shprehim traditat dhe vlerat, por bëjmë edhe lidhjen mes të shkuarës, të tashmes dhe të ardhmes. Kjo veprimtari do të jetë si një udhëtim në kulinarinë e përgatitur nga amvisat arumune që jetojnë në zemër të Myzeqesë. Kulinaria arumune bazohet kryesisht në përbërës të thjeshtë, por cilësorë: djathi, gjalpi, bylmeti, mishi i qingjit i rritur në kushtet e shtëpisë dhe brumërat të përgatitura sipas recetave të trashëguara në breza. Gatimet dhe rrëfenjat autentike që qëndrojnë pas tyre, zbulojnë jo vetëm shijet, por edhe vlerat kulturore të kësaj pakice. Shija dhe trashëgimia e pakicave e bën Fierin një destinacion me një turizëm jo vetëm të larmishëm, por edhe të qëndrueshëm. “Jemi të ndërgjegjshëm që ky ekspozim gatimesh nuk ka të bëjë thjesht me promovimin e kulinarisë arumune, por edhe me përgjegjësinë për t´i njohur, ruajtur dhe përcjellë ato më tej. Për këtë po punojmë ngushtë me komunitetin arumun vendas, me artizane dhe amvisa për të ngritur një ofertë promovuese të kulinarisë arumune sa më të plotë, të qëndrueshme dhe të lidhur me vlerat tona”, shprehet znj. E. Binjaku koordinatorja e projektit.
Qëllimi: Nëpërmjet demonstrimit të kulinarisë tradicionale të amvisave arumune që jetojnë në Bashkinë e Fierit do të promovohen gatimet që do të jenë edhe pjesë e botimit të një broshure mbi “Trashëgiminë Kulinare” duke nisur që nga përgatitja e ushqimit tradicional, historiku i tyre, deri tek recetat përkatëse.
Projekti: Trashëgimia dhe kultura arumune, së bashku dhe në një tryezë” realizohet “Me mbështetjen e Komitetit për Pakicat Kombëtare”.
