Këshilli Kombëtar për Integrimin Europian zhvilloi takimin me temë “Lufta kundër piraterisë digjitale dhe audiovizive, progresi dhe sfidat në kuadër të negociatave për anëtarësim në Bashkimin Europian”. Këshilli Kombëtar për Integrimin Europian (KKIE) zhvilloi sot takimin e radhës me fokus në luftën kundër piraterisë digjitale dhe audiovizive, progresi dhe sfidat në kuadër të negociatave për anëtarësim në Bashkimin Europian. Në takim morën pjesë anëtarë të KKIE, përfaqësues të institucioneve ligjzbatuese, operatorëve audiovizivë, etj. Në takim mori pjesë edhe anëtarja e KKIE-se znj. Entela Binjaku, drejtuese e Fondacionit HM.
Takimi u përshëndet nga z. Taulant Balla, Bashkëkryetar i KKIE-së, i cili vlerësoi rëndësinë e takimit për të diskutuar një temë që lidhet me parimet themelore të shtetit të së drejtës, ekonominë e tregut, sigurinë digjitale, por mbi të gjitha me procesin e anëtarësimit të Shqipërisë në Bashkimin Europian. Z.Balla theksoi se lufta kundër piraterisë digjitale dhe audiovizive nuk është më vetëm një problem i shkeljes së të drejtave të autorit, por një sfidë që prek sundimin e ligjit, ekonominë dhe detyrimet që Shqipëria duhet të përmbushë në procesin e integrimit europian.
Duke iu referuar raportit të Komisionit Europian për vitin 2025 që njeh progresin që Shqipëria ka bërë në përafrimin e legjislacionit europian dhe në përgatitjet në fushën e pronësisë intelektuale, z.Balla u ndal tek sfidat dhe theksoi se në fazën në të cilën ndodhet vendi, mbetet prioritet forcimi i institucioneve, krijimi i një historiku rezultatesh në luftën kundër shkeljeve të pronësisë intelektuale dhe veçanërisht ndaj piraterisë digjitale dhe audiovizive. Z.Balla u ndal tek masat që po ndërmerr BE për ndërtimin e një arkitekturë të re rregullatore në hapësirën e saj dixhitale, përmes Aktit të Shërbimeve Digjitale dhe Aktit të Tregjeve Digjitale, si dhe vlerësoi se Shqipëria duhet të ecë në të njëjtin ritëm në zbatimin e standardeve për shërbimet dhe tregjet dixhitale.
