Kjo është Klea Malka, studentja 22- vjeçare për mjekësi në Universitetin e Bukureshtit në Rumani. Ajo tregon për ne çfarë do të thotë përkatësia arumune dhe sa e rëndësishme është ruajtja e kësaj origjine. Kuptoni më shumë rreth saj në intervistën më poshtë. Intervistoi Regisa HOXHA.
Arumun: Përshëndetje Klea, faleminderit që pranuat për këtë intervistë!
K. MALKA- Faleminderit juve për ftesën!
Arumun: Klea cila është lidhja juaj me origjinën arumune?
K. MALKA- Përkatësinë arumune e kam trashëguar nga ana e gjyshes së mamit, ndërsa nga ana e babit jemi shqiptarë.
Arumun: Sa e ndjeni veten të lidhur me përkatësinë arumune?
K. MALKA- Duke qenë se në familjen tonë babi është shqiptar, ndikimi tek mua për këtë origjinë nuk ka qenë i madh.
Arumun: Cilat ishin hapat e tu të parë në të kuptuarit për origjinën arumune?
K. MALKA- Unë kisha dëgjuar për origjinën tonë, por nuk dija për të. Mirëpo në shtëpinë tonë ne nuk flasim arumanisht, madje dhe nga gjyshja e mamit nuk e kam praktikuar. Gjuhën e kam mësuar kur kam ardhur në Rumani për të studiuar në vitin pregatitor.
Arumun: Po me mamin a flisni ndonjëherë arumanisht?
K. MALKA- Jo asnjëherë nuk e kam praktikuar, dhe ndoshta kjo ka qenë një nga motivet që nuk e kemi kultivuar në familjen tonë.
Arumun: Pse zgjodhët Rumaninë për të studiuar dhe jo një vend tjetër, a ishte kjo një zgjedhje sentimentale?
K. MALKA- Unë jam ndikuar nga disa miqtë e mi që po ashtu studiojnë në Rumani, në Bukuresht për mjekësi. Më kanë thënë që shkollat janë me standarde të larta dhe me profesorë të pregatitur. Unë gjithmonë kam dashur që pasi të mbaroja gjimnazin të studioja jashtë shtetit dhe duke qenë se jam me origjinë arumune kjo më ka ndihmuar që të vazhdoja shkollën në Rumani.
Arumun: Duke qenë se një nxënëse me arritje shumë të kënaqshme pse mjekësia kur kishe mundësinë që të zgjidhje një degë tjetër ?
K. MALKA- Dëshira për t’u bërë mjeke në të ardhmen, ka ardhur në klasë të shtatë dhe e kam kultivuar derisa e arrita që të studioja për mjekësi.
Arumun: Përveç kohës që i kushtohesh mësimeve, me çfarë jupëlqen të merreni kur keni kohë të lirë?
K. MALKA- Unë jam një person që marr pjesë në aktivitete por jo me mendësinë që dua të fitoj diçka , marr pjesë për t’u aktivizuar dhe jo thjesht t’u përkushtohem vetëm shkollës. Kohën e lirë dua t’a shfrytëzojë për kënaqësinë time personale.
Arumun: Po familja juaj ç’ rol ka luajtur në gjithë këtë?
K. MALKA- Mbështjetjen familjare e kam pasur gjithmonë dhe në momentin që u thashë se kisha dëshirë për të studiuar në Rumani, më kanë përkrahur, kanë besim tek unë e dinin që nuk do t’i zhgënjeja dhe nuk më kanë refuzuar.
Arumun: Të kthehemi tek origjina jote, çfarë do të thotë për ty ajo dhe si duhet ruajtur në mënyrë që ajo të trashëgohet në brezat në vazhdim?
K. MALKA- Sigurisht, që është një pasuri për mua të jem me origjinë arumune dhe dua që të trashëgohet. Nga këndvështrimi im do të ishte më mirë që në Shqipëri të organizoheshin më shumë aktivitete që kanë në fokus rrënjët arumune, po ashtu duhen hapur shkolla për mësimin e gjuhës; mesa di është një në Korçë, por do të më pëlqente të kishte shkolla në qytete të tjera. Sepse në këtë mënyrë nuk do të kishte harresë të origjinës, prejardhjes arumune. Duhet mbajtur si pasuri që të mos lihet pas dore.
Arumun: A keni hasur ndonjëherë mungesë respekti, bullizëm përkundrejt përkatësisë sate?
K. MALKA- Asnjëherë, në rrethin tim shoqëror nuk ka ndodhur aspak dhe nuk besoj se ndodh. Jemi njerëz me të drejta të barabarta.
Arumun: Një këshillë për maturantët që njësoj si ju duan të studiojnë në Rumani?
K. MALKA- Çdo kush në qoftë se ka një ëndërr nuk duhet ta lërë kurrë përgjysmë, të punojë fort për atje ku do të arrijë, të lexojnë sa më shumë sepse një ditë e sigurt që gjithçka do të shpërblehet. Të mos ndalen para pengesave se në fund të fundit pengesat janë për të të ndalur. Nëse ke një vizion të qartë për jetën, të vazhdosh përpara dhe e sigurt që nuk do të zhgënjehesh në çfarëdo rruge që ke zgjedhur të ndjekësh.
