Diten e merkure, 19 nentor 2025 Këshilli Kombëtar i Integrimit Evropian (KKIE) në bashkëpunim me European Movement Albania (EMA), në kuadër të Konventës Kombëtare për Integrimin Evropian, organizuan një takim ndërgjegjësues me përfaqësues të institucioneve, botës akademike dhe OSHC-ve, pjesë e KKIE. Takimi pati në fokus çështjen e të drejtave të njeriut, sundimin e ligjit dhe llogaridhënien institucionale. Ne takim mori pjese edhe znj. Binjaku, drejtuese e Fondacionit HM. Takimi u zhvillua pranë Kryesisë së Kuvendit, në sallën e Grupeve Parlamentare. Këshilli Kombëtar i Integrimin Europian (KKIE) në bashkëpunim me European Movement Albania (EMA), në kuadër të Konventës Kombëtare për Integrimin Evropian, organizuan një takim ndërgjegjësues me përfaqësues të institucioneve, botës akademike dhe OSHC-ve, pjesë e KKIE.
Takimi i konceptuar si një forum për dialog midis deputetëve të Kuvendit, institucioneve publike, botës akademike dhe shoqërisë civile mbi përafrimin e kuadrit të të drejtave të njeriut të Shqipërisë me standardet e BE-së, pati një fokus të veçantë në çështjen e të drejtave të njeriut, sundimin e ligjit dhe llogaridhënien institucionale. Aktiviteti u përshëndet nga z. Taulant Balla, Nënkryetar i Këshillit Kombëtar i Integrimit Europian, i cili pasi u uroi mirëseardhjen të ftuarve, theksoi rëndësinë e takimit në një moment vendimtar në procesin e integrimit europian të vendit, kur tashmë Shqipëria ka hapur zyrtarisht të gjithë grupkapitujt e negociatave me Bashkimin Europian. Më tej takimi u përshëndet nga z.Gledis Gjipali, Koordinator i Konventës Kombëtare për Integrimin Europian në Shqipëri/ Drejtor Ekzekutiv i Lëvizjes Europiane në Shqipëri, i cili vlerësoi bashkëpunimin e mirë ndër vite me KKIE, për trajtimin e çështjeve të veçanta dhe të ndjeshme për shoqërinë shqiptare dhe rrugën transformuese që do të sjellë procesi. Duke nënvizuar rolin që ka shoqëria civile për të sjellë shqetësimet apo sugjerimet e aktorëve të ndryshëm të interesit pranë institucioneve kryesore në procesin e integrimit europian, z.Gjipali vlerësoi punën e Kuvendit për krijimin e një platforme interaktive të konsultimit publik. Takimi u përshëndet nga z. Ivan Štefanec, ish-deputet dhe eurodeputet sllovak, i cili vlerësoi progresin e bërë nga Shqipëria dhe nënvizoi rëndësinë që ka mbështetja e qytetarëve shqiptarë për ta parë të ardhmen e vendit brenda BE-së. Z.Štefanec theksoi rëndësinë e forcimit të rolit të Kuvendit për monitorimin e procesit të negociatave dhe punës së qeverisë, por dhe çuarjen përpara të procesit. Duke vlerësuar arritjet e shënuara nga Reforma në Drejtësi dhe nismën e marrë për krijimin e të parit portofol qeveritar virtual, i mundësuar nga inteligjenca artificiale, që do të jetë përgjegjës për të gjitha prokurimet publike, z. Štefanec theksoi se pavarësisht arritjeve mbresëlënëse që janë arritur, duhet të vijohet të tregohet vëmendje në drejtim të pavarësisë së gjyqësorit dhe respektimit të të drejtave të njeriut, lirinë e medias, garantimin e aksesit nga të gjithë qytetarit të shërbimeve on-line dhe forcimin e llogaridhënies dhe garantimin e transparencës institucionale. Në pjesën e dytë të takimit, znj. Nirvana Deliu, Drejtoreshë e Projektit, Lëvizja Europiane në Shqipëri (EMA) paraqiti disa rekomandime të dala nga konsultimet me shoqërinë civile dhe ekspertët lidhur me çështje të të drejtave të njeriut, si: trajtimi i problematikës së bullizmit në median on-line, nevojën e buxhetimit më të mirë të institucioneve të pavarura për ngritjen e kapaciteteve të burimeve njerëzore, etj. Aktiviteti vijoi me pyetje dhe diskutime të hapura mes pjesëmarrësve.
