Këshilli Kombëtar për Integrimin Europian (KKIE) në bashkëpunim me Lëvizjen Europiane në Shqipëri (EMA) organizuan takimin rajonal ndërgjegjësues me temë: “Plani i Rritjes për Ballkanin Perëndimor dhe ndikimi i tij në përshpejtimin e reformave të shtetit të së drejtës”. Në takim mori pjesë edhe përfaqësuesja e Fondacionit “H.Martineau” znj. E.Binjaku.
Aktiviteti u përshëndet nga znj. Jorida Tabaku, Kryetare e Këshillit Kombëtar për Integrimin Europian, e cila pasi u uroi mirëseardhjen të ftuarve, theksoi rëndësinë e takimit në trajtimin e përfitimeve dhe sfidave të përbashkëta që shoqërojnë Planin e Rritjes për Ballkanin Perëndimor. Z. Toni Gogu, zëvendëskryetar i Këshillit Kombëtar për Integrimin Europian në fjalën e tij përshëndetëse vlerësoi hapat e ndërmarra nga Shqipëria dhe nënvizoi faktin që vendi është bërë promotor i një sërë nismash rajonale. Takimi u përshëndet nga Ambasadori i Mbretërisë së Vendeve të Ulëta në Republikën e Shqipërisë, z. Reinout Vos, i cili vlerësoi se Plani i Rritjes është një mundësi mjaft e mirë financiare për vendet e Ballkanit Perëndimor për ndërmarrjen e reformave të qarta, garantimin e sundimit të ligjit, etj. si dhe nënvizoi faktin se integrimi europian është në proces i cili i takon të gjithë shoqërisë. Më pas takimi u përshëndet nga znj. Elvira Kovacs, Kryetare e Komisionit për Integrimin Europian të Parlamentit serb, e cila nëpërmjet një videomesazhi vlerësoi rolin e Serbisë në nismat rajonale dhe theksoi rëndësinë e bashkëpunimit rajonal në fushën e teknologjisë së informacionit, për përballimin e sfidave globale. Znj. Takimi u përshëndet nga znj. Odeta Barbullushi, Këshilltare e Kryeministrit dhe Koordinatore Kombëtare për Zonën Ekonomike Rajonale, e cila bëri një përmbledhje të hapave të ndërmarra dhe piketave të para që çuan në Planin e Rritjes dhe Reformave të BE-së; veprimet specifike që parashikon Plani për zhvillimin dhe integrimin ekonomik të Rajonit me ecurinë e reformave që lidhen me sundimin e ligjit, përmirësimin e klimës së biznesit, mirëqeverisjen në fushën ekonomike. Më tej takimi u përshëndet nga z.Gledis Gjipali, Koordinator i Konventës Kombëtare për Integrimin Europian në Shqipëri/ Drejtor Ekzekutiv i Lëvizjes Europiane në Shqipëri, i cili vlerësoi rëndësinë e takimit për përfshirjen e të gjithë palëve në procesin e integrimit, por dhe garantimin e rritjes së transparencës dhe llogaridhënies. Takimi u përshëndet dhe nga znj. Bojana Selakovic, Koordinatore e Konventës Kombëtare për BE-në në Serbi, znj. Mileva Gjurovska, Koordinatore e Konventës Kombëtare për BE-në, Maqedonia e Veriut/Presidente e Lëvizja Europiane në Maqedoninë e Veriut, të cilat vlerësuan rolin e shoqërisë civile në promovimin e vlerave europiane në Rajon, me synimin për të rritur nivelin e demokratizimit, por dhe ofruar rekomandime të vlefshme. Takimi rajonal vijoi me dy panelet me temë: “Përshpejtimi i reformave për Çështjet Themelore: Përafrimi me objektivat e Planit të Rritjes për Ballkanin Perëndimor bazuar në katër shtyllat e tij” dhe “Mësimet nga zbatimi i Mekanizmit të Shtetit të së Drejtës së BE-së në Shtetet Anëtare dhe ndikimi i pritshëm nga zbatimi i tij në Ballkanin Perëndimor”, ku ndër të tjera u trajtuan tema si: rëndësia e miratimit të Planit të ri të Rritjes për Ballkanin Perëndimor të krijuar nga BE-ja si një përpjekje për të përshpejtuar konvergjencën socio-ekonomike; shqyrtimi i katër shtyllave të Planit të Rritjes që do të nxisin avancimin e procesit të anëtarësimit, dhe veçanërisht përshpejtimin e reformave në fushat e mbuluara nga Grup Kapitulli 1 – Themeloret, etj.
